गोरखाको केरौजामा निःशुल्क स्वास्थ्य शिविरबाट ७ सय ७४ जना लाभान्वित

गोरखा । उत्तरी गोरखाको धार्चे गाउँपालिका–२, स्थित केरौजामा सञ्चालित निःशुल्क स्वास्थ्य शिविरमा ७ सय ७४ जनाले उपचार सेवा लिएका छन् । दुर्गम भेगका नागरिकमा सहज स्वास्थ्य उपचारको पहुँच पु¥याउन गाउँपालिका स्वास्थ्य शाखाको आयोजनामा शिविर सञ्चालन गरिएको गाउँपालिकाका अध्यक्ष लक्ष्मण गुरुङले जानकारी दिए।

शिविरमा १७७ जनाले स्त्री तथा प्रसुती रोगको उपचार सेवा लिएका छन् भने ३ सय ३४ जनाले नाक, कान र घाँटीको उपचार गराएका शिविर आयोजक समितिका संयोजक एवं मुटु फाउन्डेसनका अध्यक्ष धनबहादुर गुरुङ्गले बताए । शिविरमा स्वास्थ्य जाँच गराएका मध्ये १५६ जनाले युएसजी, ७२ जनाले इसिजी सेवा लिएको उनको भनाई छ ।

ग्रीन सिटी हस्पिटल काठमाडौँको प्राविधिक सहयोग तथा मुटु फाउन्डेसन काठमाडौँ र मनोज एसोसिएसन फ्रान्सको आर्थिक सहयोगमा दुई दिने शिविर सञ्चालन गरिएको हो । केरौजा स्वास्थ्य चौकीमा भएको शिविरमा ११७ जना महिलाको पाठेघरको मुखको क्यान्सरको पूर्वपहिचानका लागि ‘भिआइए’ जाँच गरिएको गुरुङले बताए ।

जसमध्ये १५ जनामा ‘भिआइए’ रिर्पोट पोजेटिभ देखिएपछि उनीहरुको थप परीक्षणका लागि नमुना संकलन गरी पठाइएको छ । त्यस्तै शिविरमा पाठेघर खस्ने समस्या भएका १० जना महिलाको पाठेघरमा ‘रिङ प्रेसरी’ राखेर उपचार गरिएको उनले जानकारी दिए।

शिविरमा ग्रीन सिटी हस्पिटलकी बरिष्ठ स्त्रीरोगरोग तथा क्यान्सर विशेषज्ञ डा।अनिता थापा, नाक, कान तथा घाँटी रोग विशेषज्ञ डा।चेतना पाठक, अल्ट्रासोनोलिजिष्ट डा।विनोद शाह, जनरल फिजिसियन डा।प्रवेश गौतम, डा।निता जिसी, फ्रान्सेली डा।लोरेन्जलगायतका चिकित्सकको टोलीले उपचार सेवा प्रदान गरेका थिए ।

गाउँमै चिकित्सकबाट स्वास्थ्य जाँच गर्न पाएपछि स्थानीय नागरिक खुशी भएका छन् ।