गोरखामा सुनचोरी गर्ने युवक पुर्पक्षका लागि कारागार चलान

गोरखा। गएको चैत्र महिनामा गोरखा सदरमुकामको एक घरमा चोरी गरेको आरोप लागेका एक पुरुषलाई पुर्पक्षका लागि कारागार चलान गरिएको छ । मोहम्मद जफर नामका ति ब्यतीले सोमबार गोरखा जिल्ला अदालतले पुर्पक्षका लागि कारागार चलान गरेको हो ।

आरोप लागेका जफरले गएको चैत्र २१ गते बिहान १० बजेको समयमा गोरखा नगरपालिका–८ को पेट्रोलपप्प नजिकै रहेको रामकुमारी भट्टको घर भित्र पसी सुनका गहना र नगद चोरी गरेको आरोप लागेको जिल्ला प्रहरी कार्यालय गोरखाका प्रहरी नायब उपरिक्ष एवं सूचना अधिकारी रमेशकुमार श्रेष्ठले जानकारी दिए। उनि भारतीय नागरिक हुन् ।

डिएपी श्रेष्ठका अनुसार जफरले भट्टको घरको ढोका फुटाई कोठा भित्र रहेको सुनको सादा रिङ, हार, झुम्का, चुरा, झुम्का, सिक्री, टप, नगद १० हजार का साथै १ थान मोबाईल चोरी गरेका थिए । घटना लगत्तै भारत इस्लामपुर–८ रक्सौल पूर्वी चम्पारण बिहार घर भई गोरखा नगरपालिका–८ सिमलगैरी बस्दै आएका जफरको १ थान मोबाइल फेला परेको थियो ।

जफरलाई नकवजनी चोरी कसूर शिर्षकमा मुद्दा दर्ता गरी अनुसन्धान पश्चात सरकारी वकिलको कार्यालयबाट राय सहित सोमबार अदालत पेश गर्दा पुर्पक्षको लागि कारागार थुनामा पठाएको प्रहरीले जानकारी दिएको छ ।