गोरखामा कार्यरत प्रहरी सहायक हवल्दार रानाको दुर्घटनामा मृत्यु

गोरखा, १७ माघ । गोरखामा कार्यरत ३३ वर्षीय प्रहरी सहायक हवल्दार रमेश रानाको सवारी दुर्घटनामा परी मृत्यु भएको छ । अस्थायी प्रहरी पोष्ट धारापानीमा कार्यरत राना घर विदामा रहेका बेला मोटरसाइकलमा बुटवलबाट काठमाडौँ जादै गर्दा नारायणघाट–मुग्लिङ सडक खण्ड अन्तर्गत भरतपुर महानरपालिका–२९, पन्द्रकिलोमा ग २३ प १५५९ नम्वरको मोटरसाइकल अनियन्त्रित भई दुर्घटनामा परेका थिए ।

पुल बनाउन खनेको खाल्डोमा खसेर दुर्घटना हुँदा सहायक हवल्दार राना र सोही मोटरसाइकलमा सवार विकास कुमार पुन घाइते भएका थिए ।

उपचारको क्रममा चितवन स्थित पुरानो मेडिकल कलेज भरतपुरमा सहायक हवल्दार रानाको मंगलबार राति मृत्यू भएको जिल्ला प्रहरी कार्यालय गोरखाका डिएसपी रमेश कुमार श्रेष्ठले जानकारी दिए । घाइते पुन भने उपचाररत छन् ।

मृतक ३३ वर्षीय राना रुपन्देही कन्चन गाउँपालिका–४ का स्थायीबासी हुन् । उनी गण्डकी प्रदेश विपद् व्यवस्थापन गुल्म बाग्लुङ दरबन्दी रहेर काजमा अस्थायी प्रहरी पोष्ट धारापानी गोरखामा कार्यरत थिए ।