गोरखामा ट्याक्टर दुर्घटना हुँदा एक जनाको मृत्यु, ३ घाइते

गोरखा । गोरखामा ट्याक्टर दुर्घटनामा परी आज एक जनाको मृत्यु भएको छ भने अन्य ३ जना घाइते भएका छन् । जिल्लाको सहिद लखन गाउँपालिका ३ स्थित सिलिङदोभान सडकखण्डमा घ १ त १२५ नम्बरको ट्याक्टर विहान करिब १० बजे दुर्घटनामा परेको जिल्ला ट्राफिक प्रहरी कार्यालय गोरखाका प्रमुख शिवप्रसाद पाठकले जानकारी दिए ।

दुर्घटनामा परी गण्डकी गाउँपालिका ३ घर भएका २९ बर्षका पदमबहादुर थापामगरको मृत्यु भएको उनले बताए । दुर्घटनामा गम्भीर घाइते हुनुभएका थापामगरलाई उपचारका लागि चितवन मेडिकल कलेजमा पु¥याएको थियो । उपचारको क्रममा थापामगरको मृत्यु भएको प्रमुख पाठकले जानकारी दिए ।

दुर्घटनामा सहिद लखन गाउँपालिका वडा नम्बर ३ घर भएका २६ बर्षका रामबहादुर आलेमगर, तनहुँको आवुखैरेनी गाउँपालिका–३ बस्ने २२ बर्षका प्रदिप अर्याल र गोरखा नगरपालिका–१३ घर भएका ट्याक्टर चालक ३५ बर्षका विश्वास गुरुङ घाइते हुनुभएको छ ।

घाइतेहरुको चितवनमा उपचार भइरहेको छ । ज्याप्राङबाट नाम्जुङतर्फ ढुङगा बोकेर जाँदै गरेका ट्याक्टर सडकमा पल्टिएर दुर्घटनामा परेको हो । घटनाको सम्बन्धमा थप अनुसन्धान भइरहेको जिल्ला ट्राफिक प्रहरी कार्यालय गोरखाले जनाएको छ ।