मनकामना दुर्घटना अपडेटः मृत्यु भएका ५ जनाकै सनाखत

गोरखा, ८ असार । गोरखाको शहिद लखन गाउँपालिका–३ अमलडाँडा पात्ले खोलामा जिप दुर्घटना हुँदा मृत्यु भएका ५ जनाकै सनाखत भएको छ।

मृत्यु हुनेमा शहिद लखन गाउँपालिका–५ पोखरीडाँडाका १९ वर्षीय प्रविन थापा, २८ वर्षीय वीरबहादुर थापा, १९ वर्षीय निरज थापा, १९ वर्षीया नविना थापा र ६४ वर्षीय धनबहादुर थापा रहेको प्रहरीले जनाएको छ ।

दुर्घटनामा १२ जना घाइते भएका छन् । जिप दुर्घटनामा घाइते भएका ९ जनाको तनहुँस्थित आबुखैरेनी अस्पतालमा उपचार भइरहेको छ । घाईते मध्ये ३ जनाको अवस्था गम्भिर भएकाले भरतपुर अस्पताल चितवन रिफर गरिएको प्रहरीले जनाएको छ ।

दुर्घटनामा दोषबहादुर थापा, होमबहादुर राना, सुरज राना, नरबहादुर थापा, चन्द्र थापा, सन्दिपा राना, सुरज थापा, कुलबहादुर राना, मनिका राना, प्रतीक राना र लक्ष्मी थापा घाइते भएका छन् ।

गएराती करिब १२ः३० बजेको समयमा शहिद लखन–३ कोडगाउँबाड वडा नम्बर ५ को पोखरीडाडाँ जन्ती लिएर फर्कंदै गरेको प्र ३–०१–०२३ च २४२७ नम्बरको जिप सडकबाट दुई सय ५० मिटरको भीरबाट खसेर दुर्घटना भएको जिल्ला प्रहरी कार्यालय गोरखका डिएसपी लिलाराज लामिछानेले जानकारी दिए ।